سين و صاد

س: " عارف... أجمل شعور لما تقولك كلمة بحبك أول مرة..."
ص:" صحيح"
س:" بتحس انك غرقان في نشوة مش معقولة ، سعادة يمكن توصل لدرجة البلاهة ، غيبوبة سعادة.... بتفضل قاعد كذا ساعة مبتسم و مش بتعمل حاجة غير انك سعيد و قاعد في مكانك"
ص:" و تحس ان صدرك بيطلع نور"
س:" و تفضل تعرق حتى لو في عز الشتا.."
ص:" لأ ، مبيفرقش معاك شتا ولا صيف"
س:" و بتحس أن االغد مشرق و تلاقي نفسك مليان أمل"
ص:" و ان مفيش أي مشاكل ممكن توقفك ، و مبيهمكش الكوارث ولا السياسة ولا المجاعات و لا الحروب و لا أي حاجة .... و تلاقي نفسك عمال تفكر في اسامي ولادكم..."
س:"هيا قالتلك الأول ، و لا انت قلتلها؟"
ص:" هاها ! تقدر تقول انه كان حب من طرف واحد.... كانت تقلانة عليا قوي...مرة رحتلها و كان عيد ميلادها...و اديتها وردة حمرا و دبدوب و ورقة فيها قصيدة كاتبهالها...."
س:" و...؟"
ص: "قالتلي : آه... أوكي... متشكرة "
س:" و بعدين..."
ص:" فرصة نجاح محدودة و بعديها قالتلي ، انا بقدرك كزميل..."
س:" و خلينا أصحاب احسن ... هاهاها"
ص:" بالزااااااابط"
س:" و انت عملت ايه"
ص:" ولا حاجة ، في أوضتي أسمع أم كلثوم و كاظم و عبد الحليم ، و اعيط و أكتب شعر"
س:" ولا يهمك.... أنا كنت بحب أسمع أغاني بس في فترة الغيبوبة الاولى..."
ص:" و لما موضوعكم فشل عملت ايه...؟"
س:"هربت .... كنت بشغل نفسي بأي حاجة و كل حاجة...."
ص:" و خلص برضه زيي ، خلينا اخوات أحسن؟"
س:" لأ ، خلص بأني ندمانة على كل لحظة ضيعتها عليك ، و انا مبسوطة انك ظهرت على حقيقتك قبل ما الموضوع يتطور و اني مش قادرة أصدق ان في بني آدمين أخلاقهم كده...."
ص:" و بعدين..."
س:" ولا قبلين ...هاهاها.. و مين ينسى... و مين يقدر في يوم ينسى .... شعاع أول شرارة حب.... ولا أول سلام بالايد..."
ص:" انت بتهزر ، بس لو طولت في الأغنية دي هعيط بجد...."




*الصورة من فيلمي الرومانسي المفضل : قبل شروق الشمس .... و الذي حمل لي بحثي عن رابط له اليوم مصادفة سعيدة عندما اكتشفت أن جزء ثانيا منه أنتج هذا العام بعنوان قبل غروب الشمس